老友近日收到不少銀主盤資料，樓價的確是低於市價，但沒有優質樓盤，大多數是低層以及方向不佳的單位，老友話，做得財仔，應該好醒目，點解會接受那些單位做抵押，如果賣唔走，財仔可能有損失。

　　老友可能唔明白，財仔的銀主盤並不是沒有優質貨，但很多時由業主的自己友買返，是不會在市場公開發售，就算業主冇能力買返，財仔都會以低價買下來，以後才公發售，況且現在又不須要付BSD，SSD等辣招印花稅，所以，在市場上搵唔到優質銀主盤，不過話分兩頭，如果市場上出現優質銀主盤，反而大事不妙，代表市場決乏購買力，連低於市價的優質銀主盤都冇人買，樓市想唔跌都唔得。

　　在另一方面，現在問財仔借錢的人很醒目，知道財仔冇情講，脫期供款立刻沒收物業，變成銀主盤之後立刻出售，比較優質的物業都唔會攞去問財仔借錢，所以，財仔手上根本唔會有優質扺押品，就算變成銀主盤都不是優質的，都唔知點賣，財仔都很頭痕。

　　有人話，銀主盤只要夠平，就一定可以賣走，但財仔可能被銀行所害，銀行雖然唔做那些低層，方向不佳單位的按揭，但估價就非常之高，甚至高於市價，因為銀行只會借四成，估高一兩成都沒有問題，財仔以銀行的高估價去做按揭，本來借七成變成借八成，本來借八成的變成借九成，現在賣樓一定要蝕本，所以，只要貸款不再惡化，即是債仔最低限度還息不還本，財仔都唔會賣走那些銀主盤，如果債仔躺平，本息不還，財仔明知蝕本，都迫於無奈賣走那些銀主盤，不過，如果那些銀主盤是優質的，債仔就要小心，財仔就會走一個流程，將優質的銀主盤據為己有，或者最低限度都會益自己友。