有老友問我樓市去向，我話樓價唔識睇，因為利息升得太急，政府又唔肯撤辣，香港其實已經冇乜購買力，樓價升跌難料，不過租金一定會上升，而且每個月都會上升，直至政府推出租管才會停止。
老友話點解會出現租金升，樓價唔升這個情況，這是違反樓市的物質不變定律，
樓價與租金是雙輔雙成，如果樓價下跌，表示影響樓價的各項因素轉壞，包括經濟環境，市民收入與供應量，唔通經濟唔好，市民收入減少，租金仍然會上升，而且樓宇供應充足，未來三、四年潛在供應量升了一萬個單位，供應充足，樓價唔升，租金亦唔會升。
我話風水佬呃你十年八年，但租金上升是已既定事實，我唔敢講今年十二個月都會上升，但起碼會有十個月，其實我咁樣講有少少偷雞，今年首三個月已經上升，從需求程度來看，今年連續上升十二個月並非沒有可能，我估計最後有聲音要求政府推出租管，這是一個頭痛醫頭，腳痛醫腳辦法，政府最叻的一招。
這個世界上，除了香港有辣招之外，新加坡亦有，甚至比香港更辣，令到租盤減少，租金上升，不少在新加坡工作的人因為租金升得太犀利而考慮離開，大家可能唔留意，新加坡去年租金上升了33 ％，理由同香港一樣，辣招令到冇人買樓收租，租盤減少，租金自然上升，香港與新加坡行同一條路，新加坡租金因辣招大升，香港又怎會例外，遲早問題而已。
政府在推出租管之前，首先要考慮放寛香港人買樓的辣招，最低限度香港人可以多買一個單位收租而不用繳付15%辣招印花稅，由於租金上升以及有迫切性需求，估計有不少業主會多買一個單位收租，租盤增加，租金自然可以穩定，否則，就真係要出租管，同時代表房屋政策失敗。
